Calabrisi jeu sugnu
di Domenico Caruso
Calabrisi jeu sugnu e mi ’ndi vantu,
fatigu notti e jornu e su’ cuntentu:
è duci s’è d’amuri lu me’ cantu,
amaru s’è di dògghja e di tormentu.
Di nuda cosa ’o mundu ’nd’haju schiantu
e su’ nimicu di lu tradimentu.
Tutti mi dinnu ca su’ malandrinu
puru se fazzu ’u bravu cittadinu:
pe’ fari grandi chista Terra mia
jeu volenteri l’anima darrìa!
Domenico Caruso
S. Martino di Taurianova (RC)
|
