Oh, Miraglia! ncurmiata da Cabella
puru mbicchiata sí bella.
Virdisca, Chiovariallu, Patelli, Muragliuni,
quanta iuachi di guagliuni,
nduvi ha jutu chillu arrju,
i gridati si sintianu du Ciaramiriu.
Vagliu da mpitrata
chillu ponti... n'affaccicata.
Nu suannu chilla pacchiana,
panni e rugagni lavati alla funtana.
Da via randi, un si fha tardu,
nu zumpu é si giá a Cafhardu;
puru illu é imbicchiatu,
cumu a Miraglia e Santu Nicola é abbandunatu.
Si scindi da vignola,
di nduvi a fhera o di chilla scola,
ti veni menu a parola...
Un si capisci nenti, accussí dici lla genti,
casi vecchji culli novi mbiscati,
e nta chillu ruacchju di virruacchju
strati di l'acqua scavati.
A fhuntana vecchia, u carciru, tuttu scurdatu,
u paisi piró di lla fhu ncignatu.
Du Carminu, alla villa... na jittata di vinella
e vidi giá a stratella di nu ngigniari squatrata
ma ccu nna gastima mandata;
si vidi, ha cugliutu
puru illa unnu'ha jurutu.
Si pó diri ca c'é na maledizioni,
ha cchiudutu puru a stazioni.
Cchi bella paparina!...
S'ha ucafhunatu puro a cantina.
Annestra l'enopoliu, u pulitiania, u macellu,
u cinamu, i scoli, u díurnu e ll'uffiggiu du lavoru
ca ppi Sambiasi erano tutti nu trisoru.
Un parramu i fhundachiallu, du bracciu,
parica su lla ppi impacciu;
e si chiudi puru chilla talavisioni
resta senza sangu chillu rioni.
A Craparizza é lla bicinu,
a nnu minutu di caminu,
picirilla, ricugliuta, sempre china d'allirghizza,
cumu na vecchia nanna chi t'accarizza.
Puru illa fhorsi mori,
a tutti n'avessi di duliri u cori. |
L'uartu i Carrera, si putera, parrera,
e mandera gastimi, alli luntani e alli vicini.
Oh Madonna ! ! !
Tutti sti chijazzi su stati adurnati
e sulu i mia e da Minzalora vi scurdati?
Di chilla gghjiesulilla di Puartusarvu
é megglju mu un di parru...
na fhicundiana, n'organettu e na fhuntana
e icica si fha na fhesta paisana.
A dò passi c'é Caronti, u Mituaiu e la dihisa,
n billizza i sta manera viatu chi l'avera!
E mbeci l’oru u llu vidimu
e mannaia alli cani,
ntramenti u paesi mori di fhami.
A muntagna ciangi guala,
trattata cumu na stracquala
quattru viacchi su ristati,
puarci, capriatti, fhurmaggi, fhazizza,
pumilli, patati, senza chi ni lamintamu,
si passa natru pocu u ndi mangiamu.
...E’ pirò stu muarzu i terra,
chi tantu ha piniatu,
i megli fhigli n'ha dunatu:
Nicotera, Fhiurintinu, Spusatu, Custabili,
u Ginirali Fhiori, tutti galantonti e signori,
ma poco trascurati
e puru illi su sdignati.
L’atra sira, un durmia
e guardava la luna ca ncialu lucía,
na stilla dispittusa mi zinnava,
a nna vota mi s'abbicinatu e nta na ricchia
citu citu m'ha parratu:
"U cuntamu nzema stu lamiantu,
nu pocu serji e nu pocu mbilinati,
dicinui ca Sambiasi, nu nobili cumuni
é ridduciuti, nu strazzuni".
"Oh stilla chi ncialu stai
ti dicu na cosa, chi tu nun sai,
dopu da notti veni sempri lu jiuarnu
e chini e biallu, unn'é povariallu.
Aspetta u matinu ca pua ni vidimu,
u suli chi nghiorna unn'é chillu d'aiari,
addammu tu cridi, Sambiasi é fhurzutu
e puru c'attruappica
un ha mmai cadutu". |
