Locri 08 novembre 2005

…VOLI RISPETTU
di Pasquale Mazzone
Alla Natura sempre più “contaminata”

Mali ijorna furu chilli, pe’ cchijù i na perzuna,
quando currìa nte strati l’acqua di valluna.
Rrami, terra e fangu puzzolenti
‘nta machini e ‘nte casi trasìru comu nenti.

Tuttu u paisi parìa a menz’o mari,
nci volìanu i barchi u si potìa caminàri.
Cu’ si pistava e cu’ si ciangìa,
manc’u lettu u dormi, cocchijunu cchijù ndavìa.

Mai nta vita mia ndavìa trematu tantu,
davanti a ‘sti cosi, simu sulu cinnàari o ventu.
A curpa è sulu a nostra: a Natura voli rispettu,
illa non perduna: nui poi ndi pistamu u pettu.

Maliditti i petri, i mattuni e u cimentu,
chi u lettu di valluna si futtìru a tradimentu!
Maliditti chisti mani chi arzàru a muratura
sunnu mani disgraziati: non rispettunu a Natura.

Prima u si pigghija u sordu chi faci u movi a manu
fermamundi nu minutu: cercam’u ragiunàmu.
Si a musica non cangia, i ‘sti tempi moderni
tornàmu natta vota com’a l’omu di caverni.