‘Ndimìna quante vote si bbenuta
A mme trovare mentre chi dormìa,
e parca mber’ ‘e mie tu si currùta

dicìendu ca volì’èsser’ ‘a mia.
Parch’ere n’atra vot’ a Ssuveria
ancora fhurracchjiell’ ‘e maritare,

tu me circav’ed iu circav’ a ttia
ppe mmu ‘nzème potìamu restare.
Cchi bbella notte, chilla notte llà,

quand’allu core miu t’hajiu stringiùta
ed’àppimu ‘nu pocu ‘e libertà.

L’unica vota chi nu si fhujiùta
ed avisti ‘nu pocu de pietà:
era nnu sùonnu, però, jiùre de ruta.