‘U Barveri
di Domenico Caruso


Fra li misteri chi ‘nci su‘ a lu mundu
di certu è preferitu lu barveri:
li sordi chi guadagna onestamenti
su‘ beniditti puru di‘ mugghjeri.

Sutta la manu soi pàssanu a turnu
pìcciuli e randi, ricchi e povaredi:
pe‘ la barva, lu sciampu e li capidi
vannu o‘ saloni mu si fannu bedi.

Quandu ‘nci sunnu po‘ jorna solenni,
vo‘ Pasca, vo‘ Natali o l‘annu novu,
si vaci ‘ndo barveri prestamenti
comu a ‘nu veru locu di ritrovu.

Lu postu jè daveru garantitu
mègghju ca lu salottu di ‘na vota,
undi la genti bbona si runiva
pemmu si parla o pemmu pìgghja nota.